Hüt Namittag, het dr Vatter zum Miro gseit, boue mir zäme es Wasserrad. – Aha, het der Miro gseit, es Wasserrad. – Ganz genau, es Wasserrad u när gö mer zämen a d Aare u lö das Wasserrad la loufe. – Für was de sones Wasserrad guet sig, het der Miro gfragt. – Es sig nid für öppis guet, sondern eifach schön, es sig öppis Schöns, amne säuber boute Wasserrad zuezluege, het dr Vatter gseit. Wi sech d Schufle im Kreis dräie, regumässig u langsam um d Naben ume, nume vor Chraft vom Wasser atribe. Dr Miro hätt hütt Namittag lieber mit em Aron abgmacht, aber we sech si Vatter öppis i Chopf gsetzt het, isch Widerstand zwäcklos gsii. Si hei das Wasserredli zämebout u i Fluss gsteut. – Lue, wie das schön dräit, het dr Vatter gseit, nume vor Wasserchraft atribe, isch das nid herrlech, Natur pur sig doch das. – Ihn tüech das ehnder Physik aus Natur, het dr Miro gseit. – Är söu doch itz bissoguet nid afa motze, het dr Vatter gseit, auso wenn ne si Vatter einisch nume amne Samschtignamittag a Fluss hätt mitgno mit emne säuber boute Wasserredli…! – Am Aron si Vatter schaffi im Atomchraftwärk Mühlebärg, het dr Miro gseit, u dä heig itz de gli ke Job me, weu ds AKW abgsteut wärdi. – Das heig doch itz nüt mit däm Wasserrad z tüe, het dr Vatter gseit. Sones schöns Wasserrad, är söu itz mau chli däm Wasserrad zueglege! – Us was für Houz die Schufle eigentlech sige, het dr Miro gfragt. – Us Balsahouz, het dr Vatter gseit. Ds liechtischte Houz wos git, ds beschte für e Modäubou. – Balsahouz? Het dr Miro gseit. Chunnt das nid us em Rägewaud? Dr Vatter het dr Chopf gschüttlet u gseit, är verstöng nid, werum dr Miro gäng überau nume ds Negative gsäch. Är söu doch itz eifach mau däm Wasserrad zueluege us gniesse! U das hei si de o gmacht, die zwe. Am Louf vom Fluss u am Dräie vo de Schufle zuegluegt. Dr ganz Namittag lang.
Dr Miro het de speter Umwäutwüsseschafte studiert u schafft hütt bim Bundesamt für Umwäut im Wassermanagement. Letscht Samschtig het er übrigens mit sine Ching es Wasserredli us Birkesperrhouz bout. U z Mühlebärg, ir Aare, hei sis de la loufe. Är chönnt däm stungelang zueluege, het dr Miro zu sine Ching gseit, däm Wasserredli, wi das dräit, nume vor Wasserchraft aatribe, Physik pur. U si hei am Louf vom Fluss u am Dräie vo de Schufle zuegluegt. Dr ganz Namittag lang.
