Wo bi Sigethalers ändlech die Stäge i ober Stock ibout isch gsi u der Schriner Roth gseit het das hätte mer, u är schick nächscht Wuche d Rächnig, het d Frou Sigethaler zu ihrem Maa gseit, es tüech se
gliich schad, sig die Stäge itz us Fichte, si heige doch eigentlech Bueche bsteut. – Ja nu, het der Herr Sigethaler gseit, es isch wie’s isch. Heig itz d Schrinerei Roth haut grad Fichte vorrätig gha, da müess me chli flexibu si. – Ja scho, het d Frou Sigethaler gseit, mit däm chönn si ja läbe, aber dass der Schriner Roth ihne eifach ohni öppis z sägen e gradi Stäge ibout heig, statt di bsteuti Wänduträppe, auso das stör se scho chli. – Si söu doch itz bitte nid so pingelig tue. Dä Roth isch mit der Wänduträppe eifach überforderet gsi. Da muess i säge, chapeau, dass das eine merkt u zu sine Gränze steit. – Ja guet, het d Frou Sigethaler gseit, aber dass der Roth ihne no d Rächnig gschickt heig für di nöi Chüelerpumpi vo sim Bössli, auso da göng der Roth z wit. – Da chönn doch der Roth nüt derfür, dass die Chüelerpumpi usgstigen sig, het der Sigethaler gseit. U wi si sech das vorsteui, öb der Roth de z Fuess uf d Bousteu söu? – Ja, de zau me däm haut die Chüelerpumpi, het d Frou Sigethaler gseit, aber si heig haut eifach gliich Müeh dermit, dass me di nöi Stäge gar nid chönn bruuche, weu se der Boustatiker nid abgnoh heig. Läbesgfährlech sig die Stäge, heig er gseit. Läbesgfährlech! – Är mög ihres Gjammer nümm ghöre, het der Sigethaler gseit. Si sige ja früecher o gäng usenume i ober Stock, är gsäch nid, werum das itz plötzlech es Problem söu si. So ne Houzstäge im Hus sig eifach öppis Gmüetleches u är wöu itz eifach in Rue si Fürabe gniesse.
