Dir, kennet dir der Lyssbachmärit? Z Lyss am Bach der
Lyssbachmärit!
Sit dir am Lyssbachmärit gsi?
Dir Lysser u dir Grossaffoutner, dir Chappeler u dir Wärdthofer?
Dir Hermriger, Merzliger, Büetiger, Dotziger?
Dir Aarbärger, Frienisbärger u Meinisbärger?
Dir Studener, Schüpfener, Bürener, Schürener, Safnerer,
Messener, Bangerter?
Dir Brügger u dir Aegerter, dir Schwadernouer u Seedorfer?
Dir Ruppoldsrieder, Zigurieder, Niderrieder, Meierieder?
Dir Jäiser, dir Worber, dir Spinser, dir Asper, dir Diessbacher?
Dir Orpunder u Bellmunder?
Dir Busswiler, Rapperswiler, Schnottwiler, Biezwiler, Lüterswiler, Gächliwiler, Oberwiler,
Nidouer, Büehler u Bieler?
Dir, kennet dir der Lyssbachmärit? Z Lyss am Bach der Lyssbachmärit!
Sit dir am Lyssbachmärit gsi?
Heit dir se gseh, die Windredli, die Bienewachscherze, die Plüschhäsli u die Länkdrache?
Die Chäpselipischtole, die Lädergürt, die Troumfänger u die Blächvögu?
Die Tontassli, die Teechrüeg, die Wuleschääu u die Sidefoulars?
Die Jäthoueli, Glaschugeli, Fürtüüfle u Duftöulämpli?
Die Chüngelifäu u Chabisraffle, Chirschsteichüssi, Chuchiwurscht?
Rägeschirme, Wulesocke, Meerschuumpfiife, Sunnehüet?
Wasserredli, Eierbächer, Chörnermühli, Sodasprudler?
Bohrmaschine, Beerisafter, Mässerböckli, Lampenöl?
Munggesaubi, Blattlushonig, Fiuzpantoffle, Chümischnaps?
Heit dir se gseh, die Fuesscrème, die Handschmichler, die Chopftüechli, die Zäieringe?
Die Buchtäschli, Ruckseckli, Chnöiblätze, Haarbänder?
Ohrepänkeli, Nagulagge, Nieretischli, Wimperetuschi?
Fingerringe, Hausabschnider, Schänkeli u Magebrot?
Dir, kennet dir der Lyssbachmärit? Z Lyss am Bach der Lyssbachmärit!
Sit dir am Lyssbachmärit gsi?
Heit dir se ghört, die Trummler u die Örgeler, d Auphornspiler, d Liedermacher?
D Ländlerbuebe, d Hardrockgruppe, d Steelband-Jazz- u Diexiecombo?
U heit der scho probiert vo dene Brönnte Mandle, Zuckerwatte, Chaubsbratwürscht,
Zigünerspiess?
U da: lue da, die Luschtige. Die Voue u di Truurige.
D Tänzer, d Sänger, d Liiribänze. D Liebspaar u d Überhocker.
Dir, kennet dir der Lyssbachmärit? Z Lyss am Bach der Lyssbachmärit!
Sit dir am Lyssbachmärit gsi?
