Allez-les gars, dä Cheib hole mer, dä mugge mer, dä schnapper mer üs, dä lö mer la mitloufe. Der Stouz vo de Suisse Allemands, der Hirtestouz, der Purestoutz, der Tradtitionschemp! Crêt de la Neige, Le Reculet. Grand Crêt, Colomby de Gex. Allez-les gars, dä schnappe mer üs! Sit hundertsächsesibezg Jahr schiesse si dä Chemp z Interlake über d Matte. 83 Kilo schwär sig er, der sterchscht Schwizer schiesst ne knapp vier Meter wit.
Allez-les gars, dä möge mer, de packe mer, dä schaffe mer. Les vrais béliers: Der Alain vo Soubay, der Jean-Paul vo Bonfol, vo Bémont der Clément u der Guy vo Buix, dä ma lüpfe win e Kran. Le Noirmont, Le Suchet, Le Morond, Le Taureau.
Am dritte Juni vierenachzg stöh der Alain, der Jean-Paul, der Clément, der Guy u vo Cornol d Anne-Marie z Unterseen vor em Museum. Si zahlen Itritt u ir Ingangshalle steit dä Chisu. Lue wi dä härzig driluegt. Wi bsteut u nid abghout. Der Peugéot J (Schi) 7 steit vor em Museum ir blaue Zone mit offener Hecktür. D Annemarie tüscht itz en Ohmachtsafau vor, d Kassefrou chunnt cho z renne u begleitet se in es äberümli. Di vier Manne probiere der Stei z lüpfe. Nom de dieu, qu’est-ce qu’il est lourd! Mont Rond, Mont d’Or, Chasseral.
Si schaffes, dä 167-Pfünder uf d Ladeflächi vom J7 z lege. D Annemarie chunnt itz cho z springe, der Motor louft scho u furt u wägg si si mitsamt em Unspunnestei. Heilanddonner, Stärnesiech Kanonerohr!
Das Stückli us em Kanton Jura geit speter de no witer.
Es touche ganz viu Rösser uf un e berüemte Ritter.
E Botschaftsfrou wo Model isch, e Chemp verziert mit Stärne.
U d Wiudsöu hei de d Widder gschlage, der Südjura blibt Bärner.
