Är heig sech veränderet, het mer d Christine verzeut, der Bruno heig sech eifach irgendwie veränderet, sit er bi dere Versicherig schaffi, är sig, wi söu si säge, vorsichtiger worde, ja fasch e chli ängstlech. Outofahre tüeg er nume no, wes gar nid angersch göng, mit Bänklischutte heig er ganz ufghört u sis Rennvelo heig er uf Ricardo gsteut. U o ds Schaffe im Garte oder im Hushaut sig ihm mittlerwile z risikoriich.
Si frag sech scho, het d Christine gseit, öb das der richtig Job sig für eine wi der Bruno. Der Bruno, wo früecher gäng sone Luschtige isch gsi, so fröhlech u spontan u nie öppis Böses dänkt u ohni viu z studiere aapackt heig, denn won er no uf em Grüschtbou sig gsi. U jeden Aabe, wenn er sig heicho, heig er e Gschicht verzeut, vom Polier u sim Hund, vomne schwirige Chund, aber hütt, aus Schadeguetachter bire Versicherig, auso si wüss nid… Der Bruno sig doch eifach z sensibu für das u verzeue tüeg er o nüt meh, dörf gar nid, heig Schwigepflicht. I söu mer das mau vorsteue, het d Christine gseit, der Brünu u Schwigepflicht! Aber klar sige si froh gsi, heig denn d IV die Umschuelig zaut, denn wo der Bruno hingertsi abem Grüscht sig gheit. Aber usgrächnet zure Versicherig! Är hät doch gschider Lehrer gmacht, Lehrer bruuchs gäng, Lehrer sig e sichere Bruef, aber item, het der Bruno haut Schadedienscht-Mitarbeiter gmacht u scho ds Jahr druf isch er zum Schadeguetachter ufgstige u hütt het är en aspruchsvoue Job u verdieni meh, weder denn uf em Grüscht.
Aber letschti heigs ere gliich fasch eine ggä! Chöm doch ihre Bruno plötzlech i Hochwasserhose derhär. Der Bruno wo gäng gluegt het, dass er ou optisch e Faue macht, chunnt i Hochwasserhose derhär. Us Sicherheitsgründ, het er zur Christine gseit. Si heig de no am gliichen Aabe sire Chefin es Mail gmacht, öb si der Bruno nid chönnt i Innedienscht näh – us Sicherheitsgründ. Klar, het d Chefin gseit, mir näh der Bruno gärn i Innedienscht. Aber d Hochwasserhose, die blibe, het si gseit. O im Innedienscht. Us Sicherheitsgründ.
